الثلاثاء، ٢ فبراير ٢٠١٠

مريم واحمد


هل الحب مرتبط بالغريزة ولا الانسان فى حاجة الى الحب حتى بدون دافع الغريزة؟متهيالى الانسان فى حاجة للحب بدون دافع الغريزة... ودة الى بتاكدة قصتى انا احمد طالب ابتدائى فى مدرسة على قد حالها اهلى مهتمين بيا من ناحية المزاكرة والمظهر بعكس كتير من طلاب الفصل مريم دى زميلتى فى الفصل بردة شاطرة ومريلتها نضيفة ومعاها اصحابها الانتيم امل ومروة وهما دول الشاطرين بس من البنات واحمد معاه انتيمة ابراهيم وهما دول بس الشاطرين من الولاد كانوا الخمسة محبوبين من المدرسين لتفوقهم فى المذاكرة ولأدبهم وكانوا الخمس اطفال على علاقة وثيقة ببعضهم لان فية رابط مشترك بينهم ودة طبيعى لكن الغريب ان احمد كان مبيلعبش مع الولاد وكان دائم اللعب والهزار مع البنات الثلاثة واكترهم مريم الى وقع فى حبها ووقعت فى حبة كنا بنهرب من الحصص بحجة الحمام وننزل نتكلم مع بعض وقت طويل والفسحة طبعا كنا بنقضيها لعب وهزار مع بعض واحنا مروحين كنت اروح اوصل مريم وصاحبتها الاتنين لحد المترو وارجع تانى لانى كنت ساكن جنب المدرسة وكنت دايما امثل قدمهم انى رشدى اباظة ومرة ولد من الشارع ضرب امل فجت بتشتكيلى فاخدتنى الحمية ورحت ال اية هضربة فالواد كلنى حتة علقة قدامهم بس ماعلينا العلاقة الغريبة بين احمد والبنات وخصوصا مريم والى كانت بتذيد سنة عن سنة كانت ملحوظة من المدرسين لدرجة ان انا ومريم كنا بنضرب ساعات من المدرسين ومن اباهتنا عشان نبطل لعب وكلام مع بعض كنت دايما المحلها انى بحبها وهيا كانت عارفة بس مكنش عندى الجراه انى اقول وهيا دايما كانت تحثنى ان اقول وتتحايل عليا بس كرامتها متسمحلهاش انها تصارحنى بحبها وفضلت بأجل فى مصرحتى ليها لحد سنة ساتة وقلتلها هقولك على الموضوع الى انا مخبية فى اخر يوم فى الامتحانات اخر يوم لينا مع بعض لكن للاسف محصلش بس انا مرة من كتر الغرام الى انا كنت فية استجمعت شجاعتى ورحت قلت لماما انا بحب مريم وعاوز اتجوزها انا كنت بحب التلفزيون والافلام الرومانسية جدا ومازلت فهل دة السبب لتفكيرى بالطريقة دى مش عارف المهم ان كان ابراهيم صحبى بيحب امل صاحبة مريم وقالى روح قولها وبالفعل روحت قولتلها فزعلت وسابتنى ومشيت مش عارف لية يمكن هيا كمان كانت بتحبنى ابراهيم كان اول صاحب حقيقى فى حياتى وكان اشطر منى وفى مرة كان فية مسابقة حفظ قران فأبلة صباح رشحتنى انا دون ابراهيم للمسابقة عشان كنت باخد عندها درس بعشرة جنية وبعدين جالى الكبد الوبائى قبل المسابقة وقعدت فى البيت وطبعا رشحت ابراهيم بعدى بس خفيت ورجعت قبل المسابقة فشطبت اسم ابراهيم وكتبت اسمى فوالد ابراهيم جة المدرسة محتج على الى حصل واتخانق مع الابلة وامى كانت بالصدفة موجودة فى المدرسة اليوم دة فتخانق معاها هيا كمان وكانت النتيجة ان الراجل نقل ابراهيم من المدرسة مشفناش بعض بعد كدة وبكدة خسرت اول صاحب فى حياتى بسببى المهم نرجع لمريم الى كنت بحلم انى اتجوزها ومع انى كنت مش عارف يعنى اية جواز لكن برضة كنت بحلم انى ابوسها حتى فى الرحلات كانت الرحلة الى تطلعها لازم اطلعها انا كمان الغريب فى الموضوع ان بعد منتهت المرحلة الابتدائية وكل واحد راح فى طريق منستهاش ودايما كنت بفكر فيها وبلوم نفسى انى مصرحتهاش بحبى ولما كبرت اكتر وبقيت بدور على انسانة ارتبط بيها بجد واتجوزها دايما كانت تيجى فى بالى واحلم دايما وانا صاحى وساعات وانا نايم انى هقابلها وهنعرف بعض وهتجوزها بس خلاص هيا دلوقتى عندها خمسة وعشرين سنة اكيد زمنها اتجوزت وخلفت كمان بس برضة هيفضل دايما عندى امل ان القدر يجمعنا تانى ومحدش عارف يمكن تكون هيا كمان من البلوجرز وتقرى كلامى

هناك ٣٢ تعليقًا:

المـــفـــــــقــــــــوعـــــة مــرارتـهــا يقول...

في حياة كل امرأة أحمد الطفل الصغير البريء الذي يحبها دون سبب واضح تحبسه داخل ركن قاصي من قلبها وتخرجه كلما سنحت الذكريات بذلك... وفي حياة كل رجل مريم تكون له كقطرات الندي التي تتساقط علي قلبه وتسعده عندما يعاني في حياته اليومية
قد لا يقابل احمد مريم ولكنها دوماً ستظل رفيقته الغالية التي لن تفارقه الا مع خروج الروح من الجسد

وعموما لو كان احمد لم يتزوج بعد فعليه ان يسرع الخُطي ويبحث عن مريم محبوبته وقد يجدها مازالت تتمنع علي العرسان فيتقدم لها ويكلل تلك القصة الجميلة
فيااحمد وياكل احمد المبادرة دائما في يدك انت فلا تنتظر

الأرمـوطــي يقول...

المفقوعة مرارتها...بعد الشر طبعا
الله عليكى دة من اجمل التعليقات الى جاتنى فى حياتى وانا فرحان بيكى جدا ودايما كدة تنورينى على طول فى مدونتى المتواضعة...بس بخصوص انى ادور عليها انا معرفش اى صلة توصلنى ليها وساعات بقول مش يمكن اتغيرت من نحية الشكل او الطبعومبقتش تناسبنى على قد منا بتمنى انى اقابلها الا انى خايف اكتر انى بعد مقابلها تتغير الصورة الجميلة الى فى خيالى عنها واولا واخير دة نصيب ولو ليا نصيب فيها هتكون ليا واوعدك هفكر بشكل عملى انى ادور عليها تانى
تحياتى ليكى

غير معرف يقول...

الله عالرومنسية

لسه بتحبها وفاكرها يارب تسمعك وتتتقابلوا

كل شيء جايز واحتمال تكون لسه فاكراك

بس هتلاقيها ازاي هي دي المشكلة

:]

اول حب في حياتي دايما بيفضل جوانا ومش بنقدر ننساه بتكون ليه نكهة خاصة :)

بوست جميل

بالتوفيق يارب

الأرمـوطــي يقول...

نوارة
انتى نورارة ومنورة الدنيا ومنورة مدونتى انا سعيد بزيارتك ليا ويارب دايما كنت تكونى متابعة مدونتى عشان رايك يهمنى وامين يارب فعلا تكون سمعانى وفعلا الحب الاول مبيتنسيش بس السؤال فعلا هعمل اية عشان نتجمع تانى ربنا بقة يساعدنى
تحياتى ليكى

شهد الكلمات يقول...

بس ماعتقدش مع خالص حبك و ذكراك ليها انك ماحبتش بعديها و مارتبطش و ماصرحتش بحبك ده

الانسان دايما بيحس ان الفرصة اللي فاتته هي دي كانت فرصة حياته و مش هاتتعوض و مهما لف و دار و اخد فرص كتير و نجح و كبر هاتفضل الفرصة اللي ضاعت منه هي دي اجمل و احسن فرصة و عمرها ماهتتعوض

نفس الشيء بالنسبة ليك لمجرد انك ماقدرتش تصرحلها و كان في مشاعر ناحيتها بقت هي دي قصة الحب الجميلة و هي حب حياتك و تفضل تلوم نفسك على خجلك و انك زمانك دلوقتي عايش في الجنة لو كلمتها
رغم ممكن تكون ماكنتش اجمل واحدة ولا بتحبك باخلاص ولا انتا حتي بتحبها من جوة قلبك
لكن مادام ايدك ماطلتهاش هاتفضل هي الاولي و الاخيرة
و ده طبعا مش كلام خاص بيك لوحدك انا بتكلم في العموم كلنا كدة انا كدة و انتا كدة و كلنا كدة
بس اقولك على حاجة لو في واحدة حواليك و انتا حاسس انها بتحبك و انتا مش محدد او مش في دماغك و بعدت عنك اتجوزت مثلا او زهقت من الحب اللي من طرف واحد ساعتها برده هاتحس بالندم

كلنا هذا الرجل

ربنا يرزقك ببنت الحلال اللي تحبها زي مريم

تحياتي

غير معرف يقول...

ما شاء الله عليك يا عم أرموطي

لسه فاكرها ؟؟؟؟؟؟؟ ايه الوفاء ده كله ؟ :)

ربنا يكرمك و تلاقي نصك التاني و يجمع بينكو على خير

كلماتك رائعه و أسلوبك مؤثر و صدق احساسك أهم ما في كلماتك

اول مره ازورك بس ان شاء الله مش الأخيره

و اتمنى انت كمان تشرفني بزياره صغنونه هنا
http://ra7alaat.blogspot.com/

شكرا لوقتك

القدر و انا يقول...

الارموطى
تقبل مرورى الاول
وجميل حديث الزكريات ده
ما احلى ايام الطفولة
والصبا
تحياتى يا ازهرى

الأرمـوطــي يقول...

شهد الكلمات
يمكن يكون معاكى حق...بشكرك فعلا على صراحتك وانك لفتى نظرى لنقطة مكنتش واخد بالى منها ودايما كدة منورانى فى مدونتى
تحياتى ليكى

الأرمـوطــي يقول...

اسمى احمد لو مخانتنيش الذاكرة
اهلا بيك ياحبيب قلبى فى مدونتى وشرفتنى والله بزيارك وتعليقك الجميل واول حاجة هعملها دلوقتى ان هزور مدونتك ويارب كدة دايما نكون متابعين جيدين لبعضنا
سلام ياجميل

الأرمـوطــي يقول...

القدر وانا
والله انا سعيد جدا بتشريفك ليا ويارب دايما اى حاجة بكتبها تكون عند حسن ظنك ودايما كدة تدينى رايك علشان فعلا يهمنى
منورانى

-_- يقول...

مين عارف
يمكن تتلاقوا

الأرمـوطــي يقول...

sharm
اهلا بيك لاول مرة فى مقهى الارموطى الدولى ويارب متكنش اخر مرة ويسمع منك ربنا اننا نتقابل وليك الحلاوة ياسيدة
شرفتنى

لــــ زهــــــراء ــــولا يقول...

بلاش تعلق حياتك على وجود مريم لانك قولت ان كل شئ نصيب عشان لما تلاقي بنت الحلال متقعدش بقى تقارن بينها وبين مريم اللي كبرتها جواك ورسمتها قدامك عشان حياتك تكون طبيعية ..ادعي ربنا كتيييييييييير ان انمكنلكش نصيب في مريم تنساها وربنا يكتبلك الخير يارب

لــــ زهــــــراء ــــولا يقول...

نسيت اقول اني استمتعت بقراءة القصة جدااااااااااا ):):):
دي وشوش مبتسمة

الأرمـوطــي يقول...

لولا وزهرة
اهلا بيكى لاول مرة فى مدونتى وانا سعدت كتير بتعليقك ويمكن يكون معاكى حق فى كون انى بعمل مقارنات بين مريم وبين اى واحدة تانية لانى عرفت بعدها بنات كتير بس كل مرة العلاقة كانت بتفشل يارب تكونى البوستات بتاعتى ديما عند حسن ظنك
تحياتى ليكى

Unknown يقول...

الحب له انواع واشكال كتير مش كلها مرتبطة بالغريزة ولا بالرجل والمرأة الحب هو مشاعر متبادلة دون غرض او شكل محدد كحب الوالدين او الوطن
حب الله عزوجل وهو اعظم حب
الحب حياة
رائحةامل وتفائل
كلنا نحب القصص البرئة الجميلة
زى احمد ومريم

تحياتى لك وشاكرة لك جدا زيارتك

الأرمـوطــي يقول...

نهر الحب
والله انا مش عارف اقول اية انا سعيد اوى انك زرتينى لان مدونتك من اكتر المدونات الى عجابتنى عشان كدة ضفتها عندى وتفسيرك للحب من احلى التفاسير الى سمعتها وفعلا حب الله هوا اعظم حب ودايما كدة تنورينى على طول وتدينى رايك لان رايك يهمنى
تحياتى ليكى

المحامي يقول...

أنت كبرت كثير وإلى الآن تذكرها؟؟ غريب

قال رجل لعمر بن الخطاب إني أحب امرأة ، فرد عليه وقال هذا مما لا يطاق"

إذا كانت من نصيبك الله يجمعكم إن شاء الله :)

الأرمـوطــي يقول...

المحامى
اهلا بيك فى مدونتى المتواضعة ومرسى على زوقك العالى ويارب دايما كلامى يعجبك
تحياتى

حياه بلا عنوان يقول...

السلام عليكم ورحمه الله وبركاته
هى اول زياره ليا فى المدونه بس لقيت فيها موضيع حلوه واحلها الموضوع ده بجد انت قد ايه انسان رقيق بس تفتكر فى حد كده دلوقتى فى حد يقدر يستمر على ذكره الحب المفقود انا حكمت عليه انه مفقود لانك مش لقيه وبدور عليه يمكن الحب جه فة معاد بدرى بس اكيد الحب ملوش موعيد لكن بجد انا لما قريت الموضوع قولت لنفسى ياه قد كده كان بيحبها ومستمر انه يدور عليها ومهتم انه يلقيها لان بصراحه مش بشوف كده غير فى الافلام والقصص الخياليه معلش دى بصراحه بس انا عندى سؤال ليه بعد الابتدائى بعتم عن بعض مش كان ممكن تفضلو مع بعض وكان ايه سبب البعد بعد المرحله الابتدائيه ؟ وليه مكنش فى حتى تواصل مع بعض بعد الابتدائى يمكن لو كان فيه تواصل مكنتش هتوصل انها تروح منك وتفقدها يارب يارب يقرب المسافات وتقدر توصلها وتعرف عنها اى حاجه وتقدرو ترجعو حب زمان لو هى لسه ماتجوزيتش ربنا يكرمك يارب
سورى انى طولت عليك
وياريت تقبل مرورك
تحياتى

الأرمـوطــي يقول...

حياة بلاعنوان
انا ببقى سعيد جدا لما جد بيكون مهتم كدة بالحاجة الى بكتبها وبشكرك جدا على كدة وعلى تعليقك الجميل ودايما كدة تكونى متابعانى وانا كمان هتبعك واما بالنسبة لسؤالك لية مكملناش لانها لما راحت اعدادى دخلت مدرسة تانية وكانت زعلانة منى لانى مجتليش الجراه انى اصرحها بانى بحبها بصراحة كنت خايف من اهلى واهلها ومن المدرسين زى ممجتمعنا عودنا اننا دايما نخاف وانا مكنش عندى ولا عندها تليفون بيت حتى وقتها ومعرفش هيا ساكنة فين بالظبت وكمان كنت طفل مقدرتش اقيم الشئ الغالى الى اسمة الحب واحافظ علية فهمت دة بعد كدة لما كبرت بس للاسف بعد فوات الاوان
بشكرك مرة تانية على اهتمامك

دعاء العطار يقول...

على فكره بجد قصه من اغرب القصص اللى سمعتها

مش لانك كنت بتحبها وانت صغير لان ده عادى جدااااااااا

لكن الغريب انك تفضل تفكر فيها لغاية دلوقتى وتتمنى تتجوزها

غريبه اوى ان يكون حب الابتدائى هو حب عمرك

اه ممكن يكون ذكرى حلوه تفتكرها تضحك عليها وعلى نفسك لكن مش لدرجة انك لما تكبر برضه تتمناها

لو الحكايه كده بقى

فيااااااارب يامريم ماتكونيش اتخطبتى حتى وتكونى حد من البلوجز ونتعزم بقى على فرحكم

الأرمـوطــي يقول...

dodoo
اهلا بيكى فى مدونتى وانا فعلا برضة بستغرب من نفسى لما بتخيل انى هقابلها تانى ونتجوز يمكن انا رومانسى زيادة عن اللزوم مش عارف بس انا سعيد بيكى وبزوقك وكلامك الرقيق ودايما كدة منورانى
تحياتى ليكى

فشكووول يقول...

ازيك يا أرموطى

سيبنى اختلف معاك خلف خلاف
الغريزه هى اساس العلاقه بين الرجل والمرأه
واذا كنتم فى ابتدائى ويا دوب عيال ما بتعرفوش حاجه فالغريزه موجوده
بس ما اقدرش اشرح لك والناس كلها تقرأ الحكايه
العلاقه بين الراجل والمرأه علاقه ذات بعدين
بعد غريزى وهو الاساسى والبعد الأخر بعد اكتمالى
الغريزى وعارفينه
طب ايه هو الاكتمالى
اقول لك
طبعا اى شيئ فى الدنيا لازم يكون كامل على الاقل شكلا
يعنى الراجل لازم يكون له ايدين ورجلين وراس وشعر وعيون وكل الحاجات دى
طبعا انت عارف كيف خلقت حواء
خلقت من ضلع آدم
يعنى طلع من آدم حاجه وراحت بعيد عن جسمه
آهو آدم ده عايز الحاجه اللى طلعت منه
عايزها ترجع ليه تانى
عشان كدا ربنا خلق الغريزه عشان تشد آدم لحواء دائما
وعشان بقاء الجنس البشرى
لأن بدون الغريزه ما فيش مواليد ولا اطفال ويبقى ينتهى الجنس البشرى بموت اللى موجودين
يبقى الغريزه هى الاساس
والغريزه مش حاجه وحشه ولا حاجه
دى ربنا خلقنا بيها .. بس عشان نمارسها نمارسها كما أمرنا الله
وبكلمة الله
تحياتى

الأرمـوطــي يقول...

فشكول
نورتنى والله وكلامك دة فعلا زود معلوماتى وخلانى ابص للموضوع من ناحية تانية واتمنى منك انك تزور مدونتى على طول وتثرى افكارى بتعليقاتك الجميلة
تحياتى ليك

Unknown يقول...

شكرا جزيلا
لك على ردك على بجد
بجد اسعدنى جداردك على تعليقى

لكن اين هو جديدك ؟؟

صفــــاء يقول...

برائه السرد توازى برائه طفل
حكيت حكايه كلنا كنا فيها وكلنا كنا احمد ومريم
وكانت الهدايا استيكه ومسطرة مكسورة

ولما بنكبر ... مش عارفه
بس المشاعر دى مش بتتكرر تانى ولا البرائه دى ولا النقاء دة

جميله فعلا التدوينه

الأرمـوطــي يقول...

نهر الحب
ياريت دايما اقدر اسعدك بكلامى وردوى على تعليقاتك وكدة بجد اقدر اقول انى حققت حاجة وان شاء الله فى جديد قريب
بس يا رب يعجبك
تحياتى ليكى

الأرمـوطــي يقول...

صفاء
اهلا بيكى لاول مرة فى مدونتى ويا ريت متكنش اخر مرة ودايما كدة تسعيدينى بتعليقاتك المميزة وانا متفق معاكى ان براة الاطفال لاتعوض عشان كدة ربنا مبيحسبهمش على اى حاجة غلط عملوها فى الفترة دى
تحياتى ليكى

MISS\GH يقول...

ارموطى نورت مدونتى
وسعيده جدا بزياره مدونتك اولا الصوره بتاعتك تجنن ثانيا بجد كلامك جميل جدا

ودمه خفيف قوى بحييك على روحك الجميله

الأرمـوطــي يقول...

miss /gh
اهلا بيكى فى مدونتك ودايما كدة تسعدينى بتعليقاتك الجميلة

غير معرف يقول...

البوست قديم أوى
لقيتها بالصدفة
فكرتنى بأيام جميلة

و بقصة ليها نفس الملامح
و بسعيد و هبه
نفس القصة
و ساكن جنب المدرسة
و انتيمتى
و ابراهيم اللى هو على
اللى ساب المدرسة علشان عزلوا بعد وفاه والده
و اخر يوم فى المدرسة

زرت مدرستى من شهر .. اه انا اتخرجت و بقيت مدرسة لكن فى مدرسة اعدادى .. بس كل المدرسين مصرين أكون معاهم و هشوف السنة دى

زرت المدرسة و كانت فيها ريحة الذكريات كلها كلها .. الله على البراءة
بكيت لدرجة ان كل المدرسين و المدرسات أتأثروا

و قابلت والد سعيد برة المدرسة و مكنش عندى الجرأو اكلمه

محدش يعرف نصيبه مين

و محدش يعرف لو اتقابلتم هتكون لسه ز ما فى خيالك
هيكون زى سعيد الطفل اللى فى خيالى

ربنا يسعد قلبك